05. திருமயிலை - (மயிலாப்பூர், சென்னை) - (பதிகம் 3)

திருமயிலை (மயிலாப்பூர், சென்னை)

திருமுக்கால் அமைப்பு.
வாய்பாடு:
விளம் விளம் விளம் விளம்
விளம் விளம் மா
திருஞானசம்பந்தரின் "திடமலி மதிலணி.." என்னும் சிறுகுடித் தேவாரத்தின் உந்துதலால் உதித்தவை.

வரமிக அருளிடும் மயிலையில் உறைதரு
கரமதிற் கலையுடை யீரே
கரமதிற் கலையுடை யீருமைத் தொழுபவர்
திரமது பெறுவது திடமே 1

திரம் - வலிமை
திடம் - உறுதி/நிச்சயம்

மதியணி சடையுடை மயிலையில் உறைதரு
நதியினைப் புனைந்திடு வீரே
நதியினைப் புனைந்திடு வீருமை நவில்பவர்
விதியது விலகுதல் விதியே. 2

'விதி' பொருள் முறையே:
விதி - ஊழ் (பழவினை)
விதி - இயல்பு.

மாதொரு புறமுடை மயிலையில் உறைதரு
சோதியாய் ஆழ்ந்தெழுந் தீரே
சோதியாய் ஆழ்ந்தெழுந் தீருமைத் துதிப்பவர்
கோதது குலைந்திடும் உடனே 3

கோது - குற்றம்

மதுநிறை மலர்திகழ் மயிலையில் உறைதரு
மதிலவை மூன்றெரித் தீரே
மதிலவை மூன்றெரித் தீருமை வழிபடச்
சதிகளைத் தகர்த்திடு வீரே 4

மறைகளும் புகழ்ந்திடும் மயிலையில் உறைதரு
பிறைமதி அணிசடை யீரே
பிறைமதி அணிசடை யீருமைப் பேணவே
குறைகளும் கொள்வது குறையே 5

மருங்கடை மதனெரி மயிலையில் உறைதரு
அருங்கழல் இரண்டுடை யீரே
அருங்கழல் இரண்டுடை யீருமை அடைந்திட
பெருங்கலி வல்வினை பிரிவே. 6

வானவர் போற்றிடும் மயிலையில் உறைதரு
மானமர் கரமுடை யீரே
மானமர் கரமுடை யீருமை வாழ்த்திடத்
தானொடு தனதகன் றிடுமே 7

வல்லசு ரனைச்செறு மயிலையில் உறைதரு
கொல்லர வினையணிந் தீரே
கொல்லர வினையணிந் தீருமைக் குவிபவர்
வல்லமை பெற்றிடு வாரே 8

வல்லசுரன் - இராவணன்
செறுதல் - அடக்குதல்
கொல்லரவு - கொல்லும் வல்லமை படைத்த பாம்பு
குவிதல் - வணங்குதல்

மாலயன் அறிகிலா மயிலையில் உறைதரு
காலனைக் கடிந்துதைத் தீரே
காலனைக் கடிந்துதைத் தீருமைப் புகழ்பவர்
சீலராய்ச் சிறந்திடு வாரே 9

மாவிடை ஏறிடும் மயிலையில் உறைதரு
மாவிடந் தனைநுகர்ந் தீரே
மாவிடந் தனைநுகர்ந் தீருமை வணங்கிட
மாவிடர் உறுவது மாய்வே. 10

மாவிடை - பெரிய ரிஷபம்
மாவிடம் - பெரிதாய் திரண்ட விடம்
மாவிடர் - மா இடர் - பேரிடர்.
மாய்வு - மறைவு

இப்பாடல்கள் தேவாரத்தில் திருமுக்கால் என்று குறிப்பிடப்படும் பதிகங்களின் அமைப்பில் அமைந்தவை.

இவற்றை "ஆசிரிய இணைக்குறட்டுறை" என்று கருதலாம்.

முதல் அடியும் மூன்றாம் அடியும் அளவடி; இரண்டாம் அடியும் நான்காம் அடியும் சிந்தடி.

இப்பாடல்களில் இரண்டாம் அடி மீண்டும் மூன்றாம் அடியில் வரும். (இடைமடக்கு).