28. வண்ணப் பாடல் - 07 - திருவான்மியூர்

ராகம் - தர்மவதி
தாளம் - கண்ட சாபு

தனதான தானதன தனதான

குருவாகி ஆலினடி அமர்வோனே!
..குறையாவு மேயரியும் இறையோனே!

சிரமீது வாரிமதி அணிவோனே!
..சிறியேனுன் ஆடலினில் மகிழ்வேனோ?

பரிபூர ணா!விமல! பரமேசா!
..பசுகாம தேனுபணி அமுதீசா!

திரிசூலி வாலையவள் மணவாளா!
..திருவான்மி யூரிலுறை பெருமானே!

*அரிதல் - களைதல்
*தேவலோக பசுவான காமதேனு வணங்கிய ஈசன்.
*அமுதீசன் என்றும் இத்தலத்தில் சிவனுக்குத் திருநாமம்
*வாலை - அழகிய பெண்

பாடலைக் கேட்க:
https://drive.google.com/open?id=0By387kvntVlPU0NZNXJOcGVMbUE